საქართველოს ქირურგიის მაცნე N14-15

მოგესალმებით, წარმოგიდგენთ „გ. ტატიშვილის საქართველოს ქირურგიის მაცნეს” გაერთიანებულ მე-14–15 ნომერს. გამოცემა ძალზე მრავალფეროვანია, ჟურნალში განხილულია მნიშვნელოვანი სისტემური და კლინიკური საკითხები.
ნომერი იხსნება სისტემური მიმოხილვით, რომელიც წარმოაჩენს რეგიონულ კლინიკებში ქირურგიული სერვისის კრიზისს (ქირურგ-სპეციალისტთა დეფიციტი, ანესთეზიოლოგიური ინფრასტრუქტურის სისუსტე, ემიგრაცია), რაც გლობალური პრობლემაა, თუმცა საქართველოში განსაკუთრებულ სიმძაფრეს იძენს.
ნომერში წარმოდგენილია „გიდმედის“ კლინიკური ჯგუფის, გიგანტური ვენტრალური თიაქრების დროს მუცლის წინა კედლის სეპარაციული რეკონსტრუქციული პლასტიკის (წინა, უკანა, ჰიბრიდული), ხუთწლიანი გამოცდილება (54 პაციენტი). ასევე, გთავაზობთ ბადით ჰერნიოპლასტიკის შემდეგ მუცლის კედლის ფსევდოკისტის განვითარების მეტად საინტერესო შემთხვევას. საყურადღებოა, ფონ ვილებრანდის დაავადების ფონზე განვითარებული პოსტოპერაციული სისხლდენის კლინიკური შემთხვევის აღწერა და შეფასება.
ნომერი მდიდარია იშვიათი კლინიკური სიტუაციებით: კუჭის წინა და უკანა კედლის ერთდროული პერფორაცია; კუჭის ვოლვულუსი, პოსტ-ნისენური ანამნეზის ფონზე; სანაღვლე სადინრის E3 დაზიანება ლაპარასკოპიული ქოლეცისტექტომიის შემდეგ მირიზის სინდრომის ფონზე; აპენდიქსის ნეიროენდოკრინული სიმსივნე 19 წლის პაციენტში და სხვ. თითოეული შემთხვევა — კლინიკური მსჯელობის, ანატომიური ცოდნისა და ინტერდისციპლინური თანამშრომლობის კარგი მაგალითია.
იმედს ვიტოვებთ, რომ ეს ნომერი ყველა პრაქტიკოსი ქირურგისთვის ღირებულ სამეცნიერო-კლინიკურ მასალას წარმოგვიდგენს

„გურამ ტატიშვილის საქართველოს ქირურგიის მაცნეს“
მთავარი რედაქტორი დავით ჯიქია